Raimil Óil na dTríocha Dó Contae le Brian De Vale

Le Brian De Vale agus Séamas Ó Neachtain

25 Eanáir – An Plean

Is mise Brian De Vale. Idir 14 Feabhra agus 24 Feabhra, táim chun turas a dhéanamh i gcathair Nua-Eabhraic agus sa limistéir mórthimpeall uirthi, ag tabhairt cuairte ar na tithe tábhairne chun cruthú go bhfuil sé indéanta turas fíorúil go hÉirinn a dhéanamh, gan costas taistil na n-eitleán, trí mheán mo bhuailte le duine amháin, ar a laghad, as gach contae in Éirinn, agus deoch a ól leo, amhrán a roinnt leo agus chomhrá a dhéanamh leo.

D’éirigh liom a leithéid seo a dhéanamh anuraidh. Bhuail mé le daoine as gach cearn den domhain, gach creideamh, gach cine daoine, agus mé ar an turas sin, freisin. Mar phríomhoide ar scoil phoiblí anseo i Nua-Eabhrac, bím ar saoire an t-am seo bliana, mar bíonn sos seachtaine ann sa gheimhreadh. Is breá liom teangacha agus is ceoltóir mé. Tá dlúthdhiosca agam, Raise Your Glass, agus is ball de Chumann Carad na Gaeilge mé, agus is iardhálta agus iarmhúinteoir mé de Scoil Ghaeilge Ghearóid Tóibín ar Inis Fada, freisin.

Ionas nach gceapfaí gur as mo mheabhair ar fad mé, ní mór dom a rá go mbíonn cúrsaí níos stuama idir lámha ag mo bhean is mo chlann i rith an ama seo. Téann siad ar saoire, agus sin an fáth go bhfuil an saoirse seo agamsa. Anuraidh, chuaigh siad ar thuras san Eoraip, mar shampla. Mar sin, agus mé i m’aonar anseo sa chathair iontach ilchultúrtha ar a dtugtar Nua-Eabhrac, tapaím an deis an tart a mhúchadh agus spraoi a dhéanamh, ar son cúise uasail. Nó sin mo scéal, ar aon nós!

Anuraidh, chaith mé tamall i dtithe tábhairne in Manhattan, sna Broncs, Woodlawn agus Aibhinne Maclean in Yonkers, Sunnyside, Woodside, Astoria agus Maspeth i gContae Queens, agus halla Ord Ársa na nÉireannach sa Bhablóin ar Inis Fada. Bhí dhá liosta le síniú i mo lámhleabhar, ceann dóibh siúd a rugadh in Éirinn, agus ceann do chairde eile ar bith.

Sin agaibh, an plean agus beidh scéalta go leor agam le hinsint as seo amach:

Déardaoin,14 Feabhra – AOH rannóg a dó sa Bhablóin, Inis Fada (mar a mbíonn ranganna Gaeilge gach seachtain, agus ceol traidisiúnta ina ndiaidh).

Dé hAoine, 15 Feabhra – The Wantagh Inn (agus tithe tábhairne sa limistéir sin), Wantagh, Inis Fada.

Dé Sathairn, 16 Feabhra – Croinin and Phelan’s, Astoria Nua-Eabhrac (agus ag siúl an cheantair sin, atá saibhir go leor le tithe tábhairne Éireannacha). Sunnyside agus Woodside, freisin.

Dé Domhnaigh, 17 Feabhra – Aibhinní Woodlawn/Maclean, mar a mbíonn seisiúin agus craic gach Domhnach.

Dé Luain agus Dé Máirt, sos le dhá lá, chun dul ar thuras go Boston le mo mhic óga. Agus chun teacht chugam féin as seo, b’fhéidir!

Céadaoin/Déardaoin – braitheann seo ar na contaetha a bheidh fós le fáil. Ag tosú in Astoria, is dócha. 

Beidh mo ghiotár agam an t-am ar fad agus táim ag súil go mór leis an gcomhluadar, agus leis na cairde go léir, idir shean is nua, agus leis an seans seo deoch a ól agus amhrán a chanadh le daoine ó gach contae. Go n-éirí liom, agus go dtuga Dia a chúnamh dom!